Sumarið er komið!

Lífið er yndislegt....það er allt að því 30 stiga hiti í dag og ég er komin með v-laga sólbruna á bringuna og rauða bletti á sitt hvora öxlina:) Bara að ég væri ekki að fara í próf á miðvikudaginn....:(

Ég fékk annars heimsókn af tveimur lögregluþjónum í morgun -kl.5!!! Ég vaknaði við að það var legið á dyrabjöllunni okkar, og á meðan ég dröslaðist á fætur í slopp þá heyrði ég að það var hringt á fleiri dyrabjöllum í húsinu. Þá var það ss lögreglan sem vildi komast inn í stigaganginn. Ég opnaði auðvitað fram á gang til að sjá hvað væri á seyði, og þá voru þeir að leita að vinkonu minni sem flutti héðan fyrir mörgum mánuðum síðan. Þeir höfðu nefnilega fundið veskið hennar sem var stolið af henni fyrir 2 dögum síðan!! Ég sagði þeim bara eins og var, að hún byggi ekki lengur í húsinu og þá báðu þeir mig um að hringja í hana! Ég þverneitaði að hringja og vekja hana klukkan fimm að morgni til, þannig að þeir skildu veskið eftir hjá mér og fóru.
Þegar ég vaknaði aftur í morgun varð ég að fara fram og athuga hvort mig hafi nokkuð verið að dreyma þessa vitleysu! Ég hef aldrei vitað annað eins. Þeir hafa örugglega haldið að þeir væru að gera góðgerð dagsins (eða næturinnar!), að vekja allt húsið til að koma af sér veskinu. Mig grunar að þeir hafi bara verið að spara sér pappírsvinnuna og viljað leysa þetta svona. En ég vil frekar fá minn nætursvefn takk!! Auk þess var veskið tilkynnt stolið fyrir 2 dögum síðan og þeir hefðu getað séð það ef þeir hefðu athugað það, og svo hringt í dag -á sómasamlegum tíma:) Eitthvað finnst mér að þeir ættu að nota vinnutímann sinn í að handtaka einhverja ólátabelgi í Vollsmose í staðinn fyrir að keyra út týnt og fundið:) Ég sé þetta fyrir mér gerast á Íslandi....

Óheppni

Djöfull er ég eitthvað löt að skrifa hérna! Ég er ekki í tölvustuði þessa dagana.. Enda er ég að hugsa um að hætta þessu bloggi bara.

Annars er það helst í fréttum að ég uppgötvaði í eitt skipti fyrir öll um daginn hvað ég er þroskaheft í hreyfingum! Það var nefnilega þannig að ég og Jákup vorum búin að elda þessa þvílíku hollustumáltíð: soðnar kartöflur, bologne, salat og smá dressing, og ég var búin að skræla allar kartöflurnar mínar og skera þær vel og vandlega, ausa salati, dressingu og bologne á diskinn og ætlaði svo aldeilis að fara að gæða mér á þessu -í sófanum (þó að maður eigi aldrei að borða kvöldmatinn sinn við sjónvarpið!)- nema hvað að í því að ég lyfti diskinum upp til að éta nú yfir diskinum eins og mamma sagði alltaf (af því að það ratar aldrei allt upp í munninn á mér!) þá rakst ég í hnén á sjálfri mér og diskinum hvolfdi!!! Yfir fæturna á mér, á teppið og út um allt!! Það var bara ekki annað að gera en að ausa upp kartöflunum (af því að það voru ekki fleiri en þær sem ég var búin að skræla, og ég dauðhungruð) og éta þær!:( Það er búið að henda teppinu.

Ég missi allt þessa dagana. Best að stefna ekki á langan skurðlæknaferil!:(

Hvítasunnan

Ég er tvisvar búin að ætla að skrifa eitthvað sniðugt, en hef þá verið trufluð! Það var nú samt ekki slæm truflun -á sunnudaginn vorum við skötuhjúin boðin í mat hjá Lene og Simon, og maturinn var til fyrr en ætlað. Við fengum svínalundir og alls kyns! Þá getur bloggið alltaf beðið;) Ég man hvorki af hverju ég var trufluð í hitt skiptið né hvað ég ætlaði að skrifa sniðugt!

Hvítasunnan hjá okkur fór í innileti og lestur (ekki einungis skólabókalestur verð ég að viðurkenna, ég datt í "Dalur hestanna" eftir Jean M. Auel! hehe) þrátt fyrir sól og blíðu. Það er svo gott að slappa af heima öðru hverju og fara ekki einu sinni úr náttfötunum! Við vorum reyndar boðin í afmæli hjá Rúni á laugardaginn, og fengum mjög góðan mat hjá honum, þannig að við þurftum ekki einu sinni að elda alla helgina. Ljúft!
Systir hans Jákups kemur í mat eftir smá stund, best að fara að matreiða!

25 ára

Þá er ég búin að taka þátt í "eventyrlöbet". Ég verð að segja að ég er hálfónýt eftir þá þolraun! Það var mun hlýrra í dag en á æfingunni í síðustu viku, þannig að það var ansi heitt. En ég hljóp á 58,50 mínútum. Ég náði sem sagt takmarkinu;) En Maríanna, systir hans Jákups hljóp þetta á 49 mínútum. Enda kjarnakona, og 1.83 á hæð:) Jájá. Afsakanir afsakanir!! hehe
Elskan mín er svo 25 ára á morgun! Já tíminn flýgur, við erum bara að verða fullorðin. En það verður að halda upp á þetta, þannig að það verður partý hérna á Pjentedamsgade ef það er einhver sem vill mæta á svæðið og skella á hann kanil! Við skruppum til Þýskalands á þriðjudaginn og keyptum bjór fyrir tilefnið. En það verður að segjast að við erum búin að vera ansi óskipulögð í að bjóða fólki í þetta blessaða partý, boðin hafa eiginlega bara ráðist af því hvort við höfum rekist á fólk eða ekki...:S
Svo er litli frændi loksins að fara að skella sér til Boston með mömmu og pabba til að láta kíkja á augun! Þau fara á mánudaginn og ég á eftir að hugsa mikið til þeirra á meðan á ferðalaginu stendur! Margfalt knús frá okkur Jákup hérna í baunalandi!!:)