Ég er nú bara að fíla þetta yoga meira og meira. Ég vaknaði með harðsperrur í morgun eftir miklar teygjuæfingar í gær. Ég er jafnvel að hugsa um að skrá mig á venjulegt yoga námskeið, á kvöldin, þegar þetta fæðingar yoga námskeið er búið. Ég næ ekki alltaf að gera allar æfingarnar, ef Kristina Ósk er eitthvað óþolinmóð eða svöng á meðan á tímanum stendur. Í síðustu viku náði ég næstum því bara helmingnum, því KÓ var svöng og svo kúkaði hún upp á bak og ég varð að skipta á öllu. Þegar ég kom til baka voru þær byrjaðar á slökun:( Í gær var hún óþekk og vildi ekki sofa, en kennarinn var svo sæt að halda á henni næstum því allan tímann, svo ég náði að gera mest allt. Kennarinn er alltaf með 1 eða 2 börn á handleggnum:) Það er líka æðislegt að finna hvernig líkaminn er að styrkjast eftir meðgönguna, ég verð sterkari með hverjum tímanum.

Við erum að undirbúa ferðina til Íslands á fullu þessa dagana. Ég fór með jakkafötin hans Jákups í hreinsun í gær og lét festa tölurnar betur á. Svo er ég búin að kaupa mér föt og Jákup er búinn að kaupa nýja skyrtu og bindi. Ég er í daglegum samskiptum við mömmu vegna skírnarundirbúnings. Hún greyið stendur nánast fyrir þessu, því við komum svo seint heim. En við hlökkum svo mikið til að koma heim og hitta alla, og sýna prinsessuna:-)

Ég tek allt til baka sem ég sagði um átakið! Kílóið er búið að planta sér til baka, án þess að ég hafi átt viðreisnar von. Og ég er samt ekki enn farin að éta nammi. Algjört svindl. Skil þetta ekki.

Við Kristina Ósk á kaffihúsi í gær.

Ég sat á biðstofunni hjá lækninum á mánudaginn og las viðtal við danska leikkonu sem hefur í frítíma sínum síðustu tvö árin menntað sig sem personlig coach. Hún vinnur við það núna að leiðbeina öðrum með hina ýmsu þætti lífsins, hvernig hægt er að breyta lífi sínu til hins betra. M.a. talaði hún um að eitt af því fyrsta sem þau þurftu að gera í náminu var að hugsa um nokkra litla hluti í hinu daglega lífi sem pirraði þau daglega og þau eyddu neikvæðri orku í, og reyna að breyta því í eitthvað jákvætt. Hún tók sem dæmi hjólalás sem var hálfryðgaður og pirraði hana í hvert sinn sem hún reyndi að opna hann. Hún tók sig því til og lagaði hann og gat því á hverjum degi glaðst smávegis yfir því að lásinn virkaði fullkomlega í stað þess að verða pirruð.
Ég tók þetta til mín í dag og fann fram leiðbeiningarnar að símanum mínum, og komst að því hvernig ég get fengið kommur og ð og slíkt þegar ég skrifa sms:-). Ég er búin að pirrast á því að geta það ekki síðan ég fékk símann í desember, en hef ekki hunsast til þess að komast að því fyrr en nú! Ég tek það fram að þetta er í fyrsta sinn sem ég á motorola síma;) Nú er ég ægilega ánægð með mig, hehe.
Einnig get ég grobbað mig af því að ég er búin að vera í aðhaldi (eða breyttu líferni:) í viku og hef staðist hinar ýmsu freistingar alla vikuna. Ég hef ekki borðað neitt nammi eða kökur og hef verið dugleg að hreyfa mig og afraksturinn er 1kg enn sem komið er:) Ég var meira að segja í mæðragrúppu í dag þar sem í boði voru kökur og súkkulaði, en ég dró bara fram mandarínu og borðaði hana hin sáttasta. Leiðinlegur gestur!!:-) Ég nýt þess að vera í aðhaldi með barn á brjósti! Það eina sem ég þarf að gera er að sleppa þessum óhollu aukamáltíðum og hreyfa mig, og þá virkar það. Ég borða annars allan mat og er með matarlyst á við karlmann. Best að njóta þess og nýta það meðan hægt er;-)
Kristina er farin að sofa á milli 19 og 20 á kvöldin. Það er hitt aðhaldið á heimilinu. Hún er bara svæfð, og ef hún vaknar þá er hún svæfð aftur. Það er draumur í dós að vera með úthvílt barn OG fá smá tíma fyrir sjálfan sig á kvöldin. Það þýðir þó að hún vaknar ca klst fyrr á morgnana en hún gerði áður, en ég fer sjálf fyrr að sofa líka, þannig að það er allt í lagi.

Eins og ég skrifa á barnalandi, ákvað litla frökenin að gera mömmu sinni til geðs og breytti svefnrútínunni snarlega í gær. Svaf frá 19 til 08 takk fyrir. Krossa fingur fyrir því að þetta séu nýir tímar. Ekki slæmt að hafa kvöldið fyrir sjálfan sig til þess að lesa bækur og þvo þvott:)

Fór í fyrsta skokktúr ársins í dag! Mjög stolt af mér, enda gekk vonum framar:)

Og svo elduðum við Jákup íslenskt lambalæri í fyrsta sinn á sunnudaginn og það var svo gott.....mmmmm!

Jákup er farinn að sofa....hann þarf að vakna kl.6 á morgnana. Ég er frammi í stofu að reyna að þreyta rassálfinn en hún liggur bara á leikteppinu og horfir spennt og glaðvakandi á sjónvarpið! Algjör vandræðagemlingur!:) Hún vill ekkert fara að sofa fyrr en um miðnætti, ég verð bara að gjöra svo vel að bíða þangað til. Sumir í mæðragrúppunni eru farin að sofa kl.20 á kvöldin! Ekki á þessum bæ, ónei.